Trajneri i Tottenham Hotpsur, Jose Mourinho, ka deklaruar se nuk mund të llogarisë në shërbimet e Son Heung-min për pjesën e mbetur të sezonit.
Jugkoreani ka pësuar frakturë në dorë, prandaj do t’i nënshtrohet ndërhyrjes kirurgjike dhe më pas do t’i nënshtrohet një programi rehabilitues afatgjatë.
Mungesa e tij i shton problemet te portugezi, pasi që pikërisht Son ishte angazhuar në fazën sulmuese pas lëndimit të Harry Kane në janar.
Sulmuesi nuk do të kthehet deri në muajin prill, ndërsa Tottenhami nuk transferoi lojtar tjetër për fazën e sulmit në sezonin e transferimeve dimërore.
Mourinho ka pranuar se situata është përkeqësuar shumë te skuadra e tij, e cila po synon të sigurojë kualifikimin për Ligën e Kampionëve në sezonin e ardhshëm.
“Do të na mungojë. Klubi ka shkruar një deklaratë të mirë. Po ta shkruaja unë, do ta shkruaja ndryshe. Po na mungon. Nuk do të llogaris më në të këtë sezon… Situata nuk mund të ishte më e keqe. Kjo është e qartë. Nuk mund të bëjmë asgjë. Do të luajmë me lojtarët që i kemi në dispozicion. Isha i shqetësuar se nuk kemi opsione për sulmin në bankën rezervë, tash nuk kam opsione sulmi as në fushë! Pa sulmues, pa sezon transferimesh. Asgjë. Ndihmën e vetme mund të na japin tifozët. Vetëm nga mbështetësit e Tottenhamit mund të kërkoj, sepse nga lojtarët s’kam çfarë kërkoj më tepër”, ka deklaruar Mourinho në një konferencë për shtyp.
