Lewis Hamilton (1985) ka nënshkruar një kontratë të re me Mercedes, duke u zotuar të garojë në Formula 1 për dy vite të tjera. 36-vjeçari, i cili ka fituar shtatë kampionate botërore, tani do të mbetet në këtë sport deri të paktën në vitin 2023, pasi ka bërë debutimin e tij në F1 në 2007.

Marrëveshja e re, e cila u u bë e ditur përpara se të kualifikohej për Grand Prix të Austrisë, është një deklaratë që bën të ditur qëllimin e shoferit britanik, e ardhmja e të cilit në sport kishte qenë nën spekulime të forta. Ai u bashkua me Mercedes në vitin 2013 dhe ka fituar gjashtë nga shtatë titujt e tij me ta që nga ajo kohë.

Me kontratën e re ai është zotuar të garojë me ndryshimet kryesore të rregullores që do të bëhen në sezonin e ardhshëm. Është parë si një rifillim i plotë për sportin dhe fillimin e një sfide të re për Hamilton, me një listë shoferësh të rinj gjithashtu që premtojnë shumë.

Është e vështirë të besosh që kanë kaluar gati nëntë vjet duke punuar me këtë ekip të pabesueshëm dhe unë jam i ngazëllyer që do të vazhdojmë partneritetin tonë për dy vjet më shumë.  Kemi arritur kaq shumë së bashku, por kemi akoma shumë për të arritur, si brenda ashtu edhe jashtë pistës. Unë jam tepër krenar dhe mirënjohës për atë se si Mercedes më ka mbështetur në përpjekjen time për të përmirësuar diversitetin dhe barazinë në sportin tonë. Ata e kanë mbajtur veten të përgjegjshëm dhe kanë bërë hapa të rëndësishëm në krijimin e një ekipi më të larmishëm dhe një mjedis gjithëpërfshirës. Ne jemi duke hyrë në një epokë të re e cila do të jetë sfiduese dhe emocionuese dhe mezi pres të shoh se çfarë tjetër mund të arrijmë së bashku”, ka thënë Hamilton.

Vendimi i Hamilton është gjithashtu i rëndësishëm për F1, me kampionin botëror që synon të futet në histori si më i miri në këtë sport, pasi aktualisht ka po aq tituj (7) sa legjenda Michael Schumacher.